Ardaydii ugu Tiro Badnayd oo u Fadhiistay Imtixaanka Shahaadiga ah iyo Jewigii Goobaha

Hargaysa (Jam) Arday tiradoodu dhan tahay 9,572 oo isugu jirta fasallada 4aad iyo 8aad ee dugsiyada sare iyo dhexe ayaa shalay u fadhiistay imtixaanka shahaadiga ah ee sannad-dugsiyeedka 2007/2008 ee gobolada dalka Somaliland.  Imtixaanka shahaadiga fasallada 4aad iyo 8aad ee dugsiyada sare iyo dhexe oo ay u fadhiisteen ardaydii ugu tiro badnayd, ayaa ah sannad-dugsiyeedkii ugu horreeyey ee uu si rasmi ah maalin qudha uga wada bilaabmo dhammaan gobollada iyo dagmooyinlka dalka, waxana hadda ku soo biiray degaannada Gobolka Sool iyo bariga Sanaag oo aannu hore ugaadhin maamulka Somaliland, isla markaana gacanta ugu jiray maamulka Puntland ka hor intii aanay ciidammada Somaliland xoog kaga saarin badhtamihii kalhore.
Imtixaankan oo uu diyaariyay xafiiska imtixaannaadka Qaranka Somaliland, sidoo kalena aad loo adkeeyey habka qaadistiisa oo la waafajiyey nidaamka casriga ah ee loo maamulo imtixaanada shahaadiga ah ee caalamka, ayaa ku bilaabmay jewi deggan oo ardayda iyo masuuliyiinta ilaalinayeyba ku qaabileen kalsooni iyo dareen taxadar leh.
Ardayda u fadhiistay imtixaanka shahaadiga fasalka 4aad ee dugsiga sare oo tiradoodu dhan tahay 2,986 arday oo kala socday 36 dugsi sare, laguna furay maadadda diinta oo si rasmi ah 8:00 subaxnimo uga bilaabmay gobollada iyo degmooyinka dalka, waxa uu ku bilaabmay jewi aamusan oo aan jabaq lahayn, inkasta oo ardayda laga dareemayey waxoogaa firka-nax iyo cabsi ah ay ka qabeen habka ilaalinta imtixaanka, balse markii dambe caadi ku soo noqday markii ay yaqiinsadeen in aanay wax dhibaato ahi jirin, waxaannu arday kastaa ka mashquulay akhriska su’aalaha ku qoran nuqullada imtixaanka mid-mid ka loo hordhigay. Sidoo kalena waxay maadadda labaad oo ahayd English (paper one) si nefis ah oo aan cabsi lahayn ugu fadhiisteen abbaaro 10:45 barqanimo, waxaanay ka faraxasheen 12:45 duhurnimo, iyadoo arday waliba isticmaalay aqoontiisa gaarka ah iyo fahamka uu u leeyahay daruustii la soo baray.
Sidoo kale, ardayda fasallada 8aad ee dugsiyada dhexe, tiradooduna dhan tahay 6,586 arday oo ka kala socda 113 dugsi oo iyaga laga qaaday maadadda Diinta oo keliya, ayaa iyana furitaanka imtixaanka ku qaabilay jewi deggan oo aan wax cabsi ah wadan.wariyaalka tirsan warbaahinta dalka oo booqday qaarka mid ah goobaha uu ka bilaamay imtixaanada shahaadiga dhugsiyada sare iyo dhexe ee caasimada Hargeysa, ayaa dugsiga sare ee 26 June kula kulmay Guddoomiyaha Guddiga Imtixaanaadka Qaranka Md. Daa’uud Axmad Faarax oo waqtigaa ku gudo jiray kormeer uu ku marayey xarumaha imtixaanka lagu qaadayo, waxaannu uga warramay dareenkiisa ku wajahan sida uu imtixaanku ku bilaabmeen iyo waxyaabaha cusub ee sannadkan lagu soo kordhiyey habka qaadista imtixaanka shahaadiga ah.
“Imtixanku waxa uu ku bilaabmay jewi fiican oo aan wax dhibaato ah lahayn, waxaannu u soconayaa fasallada 8aad afar maalmood, hal sarena waxa uu u soconayaa lix maalmood.
Xagga imtixaanada Somaliland muddo toban sannadood ku dhow baanu imtixaanka ka soo qaadaynay, waanna markii ay ugu badnaayeen tirada ardayga u fadhiisanaysaa, weliba badnaanshiyo keliya oo tirada ardayda ah maaha, goobaha dugsiyada soo kordhay ayaa xataa iyaguna badan, masalan meelo aan lahayn jirin iskuulo iyo meelo hore oo aanaan imtixaanka ka qaadi jirin sida bariga Somaliland ilaa Buraan, Badhan iyo Dhahar, ayaa saaka ka dhacayaa sare iyo dhexeba, markaa sannadkan dhinac walba wuu u fidsan yahay, waanna wax Ilaahay loogu mahadiyo,” ayuu yidhi Daa’uud Axmed Faarax.
“Wuxuu sannadkan kaga duwan yahay waa sannad aad moodo inay rabshadu yar tahay, ilaa hadda wax buuq iyo wax dhibaato ah meelna lagama soo sheegin weli, nabadgalyana way ku wada tageen wax shil ahna ma jirin, ilaa haddana waxaad moodaa inuu aad iyo aad u qurux badan yahay, xataa wararka gobollada ka imanaya.”
Guddoomiyaha oo la weydiiyey su’aal ahayd tirada kordhanka ee ardayda ma ku jiraan gobollada iyo degmooyinka aydaan hore uga hawlgali jirin oo imtixaan noocan oo kale ah laga qaadi jirin, waxaannu ku jawaabay; “Haa, Gobolka Sool tiro farabadan ayaa ka soo korodhay dugsiyada sare oo hadda ka hor aan laga qaadi jirin, sannadkan annagaa [Somaliland] ka qaadnay, haddana waxay u fadhiyaan imtixaanka oo ilaa Badhan, Buran iyo Dhahar saaka [shalay] waa laga wada qaadayaa, xuduudihii Somaliland oo dhanna wuu wada gaadhay, waanna wax Ilaahay loogu mahadiyo.
Hawlwadeennada kala duwan ee ka shaqaynayey imtixaanka wax la soo koobi karo maaha, marka ciidammada lagu darana waxay noqonayaa in ku dhow kun qof,” ayuu Daa’uud Axmed Faarax hadalkiisa ku soo gunaanaday.

Geesta kale, imtixaanaadka maadooyinkii laga qaaday ardayda fasallada 4aad iyo 8aad ee dugsiyada sare iyo dhexe, waxa isla shalay duhurkii si rasmi ah loogu xareeyey xarunta guud ee imtixaanaadka qaranka.
Source: Jamhuuriya

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: