Maxaa Inoo Qabsoomay Maxaase Inaga Qabyo ah


Waa qormo taxane ah oo aan ku soo gudbin doono duruufaha adag ee ku xeeran bulshada Somalida. Waxa sidoo kale qeyb ka ah waxqabadka iyo waxtarka ay dalkan geliyaan Soomaalida iyo Somalilanderka ku dhaqan oo marka la isku geeyo noqonaya ku dhawaad 20 kun oo qof.

Sida aynu la socono warbaahinta dalkani waxay si joogto ah sawir khaldan uga bixiyaan bulshada Soomaalida ah. Taas oo waxyeelo ba`an ku heysa, daboolkana saarta waxtarkooda dalkan. Way jiraan dhaliilo fara badani xaggooda, haba ugu horeyso habqan baahsan, baylahdooda oo badan iyo iyaga oo aan laheyn cid ay ku mideysan yihiin oo metesha ama lagala xidhiidhi karo.

Haddaba, waxay ugu talo gashay bahda somaliland.no. Inay noqoto qormadan taxanaha ahi goob la isku weydaarsado fikradaha xambaarsan xalka duruufaha ina horyaal. Noqotana Codbaahiyihii gudbin lahaa afkaaraha iyo wax qabadka aynu ku darsano wadankan Norway.

Waxyaabaha kale ee aan wax-qabadkooda ka faaloon doono waxa ka mid ah: Uururada bulsho, Shirkadaha, Meheradaha iyo dadka waxbartay ee aqoontooda kaga qeyb qaata dhismaha bulsho ee dalkan.

Waxa aan ka codsanaynaa dadka waxgaradka iyo aqoonyahankaba leh ee ku nool dalkan inay nagala qeyb qaataan taxanahan. Waxaanan rajeynaynaa in dad badani nala fahmi doonaan waxtarka mowduucani u leeyahay bulshadeena.

Nagala soo xidhiidh e-mailadana:
somlandnor@gmail.com ama
afadal@gmail.com

One Response

  1. Waxaa maalintii khamiistii lagu qabqabtay saddex ruux oo soomaali ah magaaladda Oslo. Dhamaan dadkan ayaa ahaa qaar ka shaqaysta meheradaha sida gaarka ah soomaalida loogu yaqaano ee telefoonadda laga dirto iyo xawaaladaha. Qab-qabashaddan ayaa keentay in saxaafaddu mar kale daba gasho oo ay fiiro gaar ah u yeelato qoomiyadda soomaalida ah ee dalka Norway deggan.

    “Arintan ayaa dadka soomaalida ah ku noqotay ka daroo dibi dhal” iyadda oo la ogyahay tuhumadii hore iyo eedaymihii hore ee dadka soomaalida ah ee dalkan Norway deggan hore loogu soo jeedin jiray. Eedaymahaas oo ay ka mid ahaayeen kufsi, dhac, gudniin, shaqo-la’aan iyo dhaqan xumooyin kale oo aan halkan lagu soo koobi karahayn.

    Nimankan oo isla markii la xidhay iyaggana lagu soo qabqabtay saddex nin oo kale dalka jaarka la ah Norway ee Sweden ayaa hadaba waxaa lagu eedeeyey arin hore soomaalida loogu tuhmay oo ahayd in ay argagixisadda maalgeliyaan. Tuhunkan iyo qab-qabashadan khamiistii ayaa soomaalidu u turjunteen “wixii xunba xaawaa leh” halkan khubaraddii iyo saxaafaddii dalkana ay u dhaqaaqeen dhamaan wixii khabiir ku sheeg ahaa ee soomaali wax ka yaqaanay.

    Waxaa isla markiiba la isla gartay in la rogo aray bixin cusub oo aanay soomaalida Norway hore u maqal oo ah “AL-SHABAAB” taas oo lagu sheegay in ay yihiin niman biraha calaashadda oo khatar ah. Waxaa intaa la sii raaciyey in nimanka la xidh-xidhay ay kooxdaa iyagga ah lacag u direen oo ay taageereen. Erey bixintan ayaad moodaa in lala helay dadka soomaalida ah ee dalkan deggan oo aad moodid in aanay fahmin habka loo isticmaalo saxaafadda. Waxyaabaha lagu dhaleeceyn karana waxaa ka mid ah in ay hor kacayaan oo dhibaatadda iyo jabka lala maaganyahay u sacabtumayaan isla markaana ay qayb ka qaadanayaan.

    Tusaale ahaan waxaa jirtay in maalintii jimcaha ahayd saxaafadii dalka joogtay oo dhami is hor tubeen goobtii ay dadka soomaalida ahi ku tukadeen salaadii jimcaha. Markii salaadii laga soo dareeray ayey saxaafadii mikrifoonadoodii iyo qalimaantoodii la soo kala baxday si ay su’aalo uga waydiiso waxyaabihii dhacay. Jawaabaha ay halkaa ka heleen ayey ka mid ahaayeen “ANAGAA AL-SHABAAB AH” iyo “ANAGA AYAA DIYAAR U AH DAGAAL iyo MAALGELIN DAGAALNA HII IYO HOOBA LA KORTAAGAN”

    Jawaabaha noocan oo kale ah ayaa hadaba waxaa isweydiin leh ku haboonaanta ay ku haboon yihiin wakhtigan isaga ah ee aynu ku jirno, iyo xaaladda dadka soomaalida ah guud ahaan. Ujeedada maqaalkani maaha dhaleeceyn, laakiin se waxaa waajib ah in la isku sheego wixii dhibaato mooyaane aan faa’iido ku jirin.

    Ugu danbeyntii waxaa aan wax wanaagsan ahayn in dhaleeceyn oo keli ah lagu soo koobo maqaalkan. Isla marka khaladka la sheegayo waxaa muhiim ah in wixii fikrad XAL ah la soo gudbiyo. Hadaba fikrad ahaan halkan waxaa lagu soo jeedinayaa in la helo oo soomaalida dhexdeeda looga baahanyahay kala-danbeyn iyo in la isku dayo wixii hadal saxaafadda loo sheegayo in la miisaamo oo laga fikiro hadaladda lagu hadlayaa cawaaqiibta ay keeni karaan. Waxaa kale oo muhiim ah in aan la isku dirin oo aan la iska soo horjeedin dadka shicibka ah ee dalka u dhashay. Taas oo aan ula jeedo in aanu mushtamacu guud ahaan aanu dadka soomaalida ah xumaan la doonayn ee ay jiri karaan koox yar oo saxaafadda u adeegsata kala fogeynta iyo isku dirka dadka.

    Ugu danbeyntii halka imika xaalku marayo ayaa ah in lix qof ee Norway iyo Sweden lagu xidhay in saddex ka mid ah la sii daayey. Laba waxaa lagu sii daayey Norway halka hal kuwii Sweden laga sii daayey.
    Ka Norway lala hadhay ayaa la sheegay in telefoonkiisa la dhagaystay isaga oo la hadlaya “Dad xagjira” oo ka tirsan wax lagu sheegay ururka “AL-SHABAAB”.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: